पोखरा १, फागुन । हाल नेपालमा पश्चिमी वायुको सामान्य प्रभाव रहेकाले देशका विभिन्न भू-भागमा मौसममा बदलाब देखिएको छ। जल तथा मौसम पूर्वानुमान महाशाखाका अनुसार आज कोशी, गण्डकी र कर्णाली प्रदेशका उच्च पहाडी तथा हिमाली क्षेत्रमा आंशिकदेखि साधारण बदली रहनेछ। तराईका केही स्थानहरूमा मध्याह्नसम्म बाक्लो हुस्सु र कुहिरो लाग्ने सम्भावना रहेकाले जनजीवन र यातायातमा सामान्य प्रभाव पर्न सक्ने देखिएको छ। दिउँसो लुम्बिनी, कर्णाली र सुदूरपश्चिम प्रदेशमा बादल लाग्नेछ भने बाँकी भू-भागको मौसम मुख्यतया सफा रहने महाशाखाले जनाएको छ।
आज राति कोशी र गण्डकी प्रदेशका उच्च पहाडी तथा हिमाली भू-भागका एक-दुई स्थानमा हल्का वर्षा र हिमपातको सम्भावना रहेको छ। तराई र उपत्यकाहरूमा तत्काल वर्षाको सम्भावना नरहेकाले वायु प्रदूषणको स्तर बढ्ने भन्दै महाशाखाले सर्वसाधारणलाई सुरक्षित रहन र आवश्यक सतर्कता अपनाउन अनुरोध गरेको छ। विशेषगरी तराई क्षेत्रमा बिहानको समयमा यात्रा गर्दा हुस्सुका कारण दृश्यता कम हुन सक्ने भएकाले सवारी चालकहरूलाई सावधानी अपनाउन भनिएको छ।
