पोखरा १४, माघ। पोखरा भद्रकालीकी ३७ वर्षीया मनीषा द्वा यतिबेला खगोल विज्ञानको प्रयोगशालाबाट निस्किएर राजनीतिको चुनावी मैदानमा उत्रिएकी छन्। आकाश र ब्रह्मान्डका रहस्यहरू सानैदेखि खोजी गर्ने रुचि भएकी खगोलशास्त्री द्वा आगामी प्रतिनिधिसभा निर्वाचनका लागि कास्की क्षेत्र नम्बर १ बाट उम्मेदवार बनेकी हुन्। कुलमान घिसिङको नेतृत्वमा रहेको उज्यालो नेपाल पार्टीबाट चुनावी प्रतिस्पर्धामा होमिएकी उनले आफ्नो प्रमुख एजेन्डा ‘विज्ञान र प्रविधिको प्रयोगमार्फत विकास र समृद्धि’ लाई बनाएकी छन्। पृथ्वीनारायण क्याम्पसबाट भौतिक विज्ञानमा स्नातक गरेकी उनले हाल एस्ट्रो फिजिक्समा पिएचडी गरिरहेकी छन् र उनी नेपालकी पहिलो महिला एस्ट्रो फोटोग्राफरका रूपमा समेत सुप्रसिद्ध छिन्।
मनीषाको प्राज्ञिक र पेशागत उचाइ निकै लोभलाग्दो छ। उनले नेपाल एस्ट्रोनोमिकल सोसाइटीको सञ्चालक समिति निर्देशक, इन्टरनेसनल एस्ट्रोनोमिकल युनियन (IAU) को तर्फबाट नेपालका लागि नेसनल आउटरिच को-अर्डिनेटर र राष्ट्रिय खगोल शिक्षा संयोजकका रूपमा लामो समयदेखि काम गरिरहेकी छन्। उनले खगोल र अन्तरिक्ष विज्ञानको क्षेत्रमा पुर्याएको योगदानका लागि नास्टबाट प्रविधि प्रवर्द्धन पुरस्कार, इन्टरनेसनल एस्ट्रोनटिक फेडरेसन इमर्जिङ लिडर अवार्ड र इन्द्रकला स्कलरसिप जस्ता प्रतिष्ठित सम्मानहरू प्राप्त गरिसकेकी छन्। नेपालमा ‘एस्ट्रो टुरिजम’ को अवधारणालाई प्रवर्द्धन गर्नमा पनि उनको महत्त्वपूर्ण भूमिका रहँदै आएको छ। सूर्य र चन्द्र ग्रहणका अनौठा दृश्यहरूलाई क्यामेरामा कैद गर्ने उनको खुबीले उनलाई अन्तर्राष्ट्रिय स्तरमा समेत चिनाएको छ।
राजनीतिमा प्रवेश गर्नुको कारणबारे स्पष्ट पार्दै मनीषा भन्छिन्, “हाम्रो देशमा शिक्षा र विज्ञान कहिल्यै पनि राजनीतिक दलहरूको प्राथमिकतामा पर्न सकेनन्, हाम्रा कुरा सुन्ने कोही भएन।” उनी केवल आश्वासन मात्र होइन, बरु प्रविधिको सही प्रयोगबाट मात्रै देशको कायापलट हुन सक्छ भन्ने मान्यता राख्छिन्। अवसर पाएको बेला पछि हट्न नहुने र आफ्ना विचारहरू जनतामाझ लैजान एउटा बलियो प्लेटफर्मको खोजीमा रहँदा उनी उज्यालो नेपाल पार्टीमा जोडिएकी हुन्। कास्की क्षेत्र नम्बर १ का मतदाताहरूका लागि उनी एक नयाँ र बौद्धिक विकल्पका रूपमा देखिएकी छन्। विज्ञानलाई सबै क्षेत्रमा अपरिहार्य ठान्ने उनको यो नयाँ सोचले परम्परागत राजनीतिमा कस्तो प्रभाव पार्छ, त्यो भने आगामी निर्वाचनको परिणामले देखाउनेछ।
