पोखरा २१, भदौ। २०औँ एसियन गेम्स (एसियाड) मा नेपालको प्रतिनिधित्व गर्न लागेको नेपाली जुडो टोली यसपटक पदकको लक्ष्यसहित व्यापक तयारीमा जुटेको छ। नेपालबाट जुडोमा छ खेलाडीले प्रतिस्पर्धा गर्नेछन्, जसमा देवकीमाया श्रेष्ठ, निशा श्रेष्ठ, विकास विक, विशेष विक, सुजन गुरुङ र पुनम श्रेष्ठ रहेका छन्। नेपाली टोलीको मुख्य लक्ष्य एसियाडमा जुडोतर्फ नेपालको पदक खडेरी तोड्नु र उत्कृष्ट प्रदर्शन गर्नु रहेको छ।
यसपटकको टोलीमा विशेष रूपमा दुई दिदीबहिनी र दुई दाजुभाइको सहभागिताले नेपाली जुडो टोलीलाई थप रोचक बनाएको छ। देवकीमाया श्रेष्ठले ५२ केजीमुनि तथा उनकी बहिनी निशा श्रेष्ठले ४८ केजीमुनि तौल समूहमा प्रतिस्पर्धा गर्नेछन्। १९औँ एसियाडमा आफ्ना दाइ इन्द्रबहादुर श्रेष्ठसँग सहभागी भएकी देवकी यसपटक आफ्नी बहिनी निशालाई साथ लिएर एसियाडको यात्रामा निस्कँदैछिन्।
देवकीका अनुसार आफ्नै बहिनीसँग प्रशिक्षण र स्पाइरिङ गर्दा बढी सहज र आत्मविश्वासी महसुस हुन्छ। उनी बहिनीको प्राविधिक कमजोरी सुधार्नेदेखि खेलको तयारीसम्म निरन्तर सहयोग गरिरहेकी छन्। देवकीले अघिल्लो एसियाडमा आफ्ना दाइबाट पाएको सहयोग र मार्गदर्शनलाई यसपटक बहिनीप्रति हस्तान्तरण गर्ने अवसर पाएको बताएकी छन्। निशाले पनि दिदीसँगै खेल्दा आफ्ना गल्तीहरू तुरुन्तै सुधार गर्न सकिने र खेलका प्राविधिक पक्षमा महत्वपूर्ण सहयोग मिल्ने बताएकी छन्।
देवकी र निशाको जुडो यात्रा सामान्य परिस्थितिबाट सुरु भएको थिएन। सिन्धुपाल्चोकको बाह्रबीसे नगरपालिका–७ घुमथाङका यी दाजुबहिनी बाल्यकालमै काठमाडौंको रानीवनस्थित बन्दी सहायता नियोग (पाम) पुगेका थिए। पारिवारिक कठिन परिस्थितिका बीच सुरु भएको उनीहरूको खेल यात्रा अहिले देशलाई अन्तर्राष्ट्रिय मञ्चमा प्रतिनिधित्व गर्ने स्तरसम्म पुगेको छ। देवकी आफ्ना दाइ इन्द्रबहादुरलाई आफू जुडो खेलाडी बन्न प्रेरित गर्ने मुख्य व्यक्ति मान्छिन्।
नेपाली टोलीमा सहभागी अर्को विशेष जोडी विकास विक र विशेष विक हुन्। दाजु विकासले पहिले जुडोमा प्रवेश गरेपछि भाइ विशेषलाई पनि यस खेलतर्फ आकर्षित गरेका थिए। अहिले दुवै एसियाडको तयारीमा सँगै प्रशिक्षण गरिरहेका छन्। विकास विशेषका लागि खेल साझेदार मात्र नभई मार्गदर्शकसमेत बनेका छन्। विशेषका अनुसार दाइसँग प्रशिक्षण गर्दा गल्ती र कमजोरीबारे जति पटक पनि प्रश्न गर्न सकिने भएकाले सिकाइ प्रक्रिया अझ प्रभावकारी भएको छ।
विकासले १९औँ एसियाडमा समेत सहभागिता जनाइसकेका छन् र अघिल्लो अन्तर्राष्ट्रिय अनुभवबाट सिकेका कमजोरी सुधार गर्दै यसपटक अझ आत्मविश्वासका साथ प्रतिस्पर्धा गर्ने तयारीमा छन्। विकास र विशेष दुवैको लक्ष्य स्वर्ण पदक जित्नु रहेको छ। विशेषले हरेक खेललाई फाइनलसरह लिएर शतप्रतिशत प्रदर्शन गर्ने रणनीति अपनाउने बताएका छन्।
टोलीका अन्य सदस्य सुजन गुरुङले ९० केजीमुनि र पुनम श्रेष्ठले ७० केजीमुनि तौल समूहमा प्रतिस्पर्धा गर्नेछन्। नेपाली सेनामा आबद्ध सुजन छोटो समयमै राष्ट्रिय टोलीसम्म पुगेर देशको प्रतिनिधित्व गर्न पाउँदा गर्व महसुस गर्छन्। पुनम भने तेस्रो पटक एसियाडमा सहभागी हुँदैछिन् र यसपटक अघिल्ला संस्करणभन्दा राम्रो नतिजा ल्याउने विश्वासमा छिन्।
मिसन २०२६ अन्तर्गत नेपाली जुडो टोलीले करिब साढे दुई वर्षदेखि नियमित तयारी गर्दै आएको छ। टोलीले दैनिक चार घण्टा प्रशिक्षण गरिरहेको छ भने पूर्वखेलाडी तथा प्रशिक्षक सुनिता मगर ताम्राकारले प्रशिक्षणको जिम्मेवारी सम्हालिरहेकी छन्। प्रशिक्षक मगरले यसपटक पदक जित्ने विश्वास व्यक्त गरेकी छन्, यद्यपि पर्याप्त अन्तर्राष्ट्रिय एक्सपोजरको अभाव नेपाली खेलाडीका लागि प्रमुख चुनौती बनेको छ।
नेपालमा जुडोका सीमित प्रतियोगिता, वैदेशिक प्रशिक्षणको अभाव र अन्तर्राष्ट्रिय प्रतिस्पर्धामा कम सहभागिताका बाबजुद नेपाली खेलाडीहरू एसियाडमा उत्कृष्ट प्रदर्शन गर्ने दृढ संकल्पका साथ मैदान उत्रने तयारीमा छन्। पारिवारिक साझेदारी, निरन्तर प्रशिक्षण र स्वर्ण पदकको उच्च लक्ष्यले यसपटक नेपाली जुडो टोलीको एसियाड यात्रा विशेष र आशापूर्ण बनेको छ।
