पोखरा २९, असार। पृथ्वीनारायण क्याम्पस (पीएनसी) पोखरास्थित साइ-टेक सोसाइटीले विद्यार्थीहरूको प्रभावकारी सञ्चार क्षमता, नेतृत्व विकास तथा आत्मविश्वास अभिवृद्धि गर्ने उद्देश्यका साथ सार्वजनिक वक्तृत्वकला (पब्लिक स्पिकिङ) सम्बन्धी कार्यशाला सफलतापूर्वक सम्पन्न गरेको छ। शुक्रबार २०८३ असार २६ गते बिहान ११ बजे विज्ञान सङ्कायअन्तर्गत रहेको ह्वाइट हाउस भवनको कक्ष नं. १४७ स्थित साइन्स सेमिनार हलमा आयोजित उक्त कार्यशालामा विद्यार्थीहरूको उत्साहजनक सहभागिता रहेको थियो।
कार्यक्रमको औपचारिक उद्घाटन साइ-टेक सोसाइटीका अध्यक्ष श्री सुजित प्रसाद कुशवाहाको अध्यक्षतामा सम्पन्न भएको थियो। कार्यक्रममा श्री विजय बहादुर थापा प्रमुख अतिथिका रूपमा सहभागी भएका थिए भने पृथ्वीनारायण क्याम्पसको भौतिकशास्त्र विभागका विभागाध्यक्ष श्री खड्का बहादुर क्षेत्री विशेष अतिथिका रूपमा उपस्थित भएका थिए। कार्यशालाको सहजीकरण पोखरा विश्वविद्यालयका विद्यावारिधि (पीएचडी) शोधार्थी तथा इन्स्ट्रक्सनल डिजाइनर श्री प्रकाशचन्द्र गिरीले गरेका थिए। उहाँले सहभागीहरूलाई प्रभावकारी सार्वजनिक प्रस्तुति, स्पष्ट अभिव्यक्ति, श्रोतासँग सम्बन्ध स्थापित गर्ने कला तथा आत्मविश्वासपूर्वक आफ्नो विचार प्रस्तुत गर्ने व्यावहारिक विधिबारे प्रशिक्षण प्रदान गर्नुभयो।
कार्यक्रममा साइ-टेक सोसाइटीका कार्यसमिति सदस्यहरूसहित ४९ जना विद्यार्थीहरूको सहभागिता रहेको थियो। कार्यशालाका क्रममा सहभागीहरूले सार्वजनिक रूपमा बोल्ने क्रममा अपनाउनुपर्ने आधारभूत सिद्धान्त, भाषणको संरचना, शारीरिक हाउभाउको प्रभावकारी प्रयोग, आवाजको उतारचढाव, श्रोताको ध्यान आकर्षित गर्ने तरिका तथा मञ्चमा देखिने डरलाई कसरी नियन्त्रण गर्ने भन्ने विषयमा व्यावहारिक अभ्यास गरेका थिए। प्रशिक्षणलाई सहभागितामूलक बनाइएको हुँदा विद्यार्थीहरूले आफ्ना अनुभव आदानप्रदान गर्नुका साथै प्रत्यक्ष प्रस्तुति दिएर प्रशिक्षकबाट सुझाव समेत प्राप्त गरेका थिए।
कार्यक्रमलाई सम्बोधन गर्दै आयोजकहरूले वर्तमान समयमा प्रभावकारी सञ्चार क्षमता, प्रस्तुति कला र नेतृत्व विकास हरेक विद्यार्थीका लागि अपरिहार्य सीप बनेको उल्लेख गरे। यस्ता सीपमूलक कार्यक्रमले विद्यार्थीहरूलाई शैक्षिक प्रस्तुति, व्यावसायिक जीवन तथा नेतृत्वदायी भूमिकामा सक्षम बनाउन महत्वपूर्ण योगदान पुर्याउने विश्वास व्यक्त गरिएको थियो। कक्षाकोठाभित्रको सैद्धान्तिक शिक्षासँगै व्यावहारिक ज्ञान र जीवनोपयोगी सीपको विकास गर्न यस्ता कार्यक्रमलाई निरन्तरता दिइने पनि आयोजकहरूको भनाइ थियो।
सहभागी विद्यार्थीहरूले कार्यशालालाई अत्यन्त उपयोगी, व्यवहारिक तथा प्रेरणादायी भएको प्रतिक्रिया दिएका थिए। विशेषगरी प्रत्यक्ष अभ्यासमार्फत सार्वजनिक रूपमा बोल्ने आत्मविश्वास बढेको, मञ्चमा बोल्ने डर कम गर्न सहयोग पुगेको तथा प्रभावकारी प्रस्तुति दिन आवश्यक सीप सिक्न पाएको उनीहरूको भनाइ थियो। आगामी दिनमा पनि सञ्चार, नेतृत्व तथा व्यक्तित्व विकाससँग सम्बन्धित यस्तै कार्यक्रम नियमित रूपमा सञ्चालन गर्न उनीहरूले आग्रह गरेका थिए।
कार्यक्रमको अन्त्य आयोजक समितिको धन्यवाद ज्ञापनसँगै गरिएको थियो। आयोजकहरूले प्रमुख अतिथि, विशेष अतिथि, स्रोत व्यक्ति, सहभागी विद्यार्थी तथा कार्यक्रम सफल बनाउन प्रत्यक्ष तथा अप्रत्यक्ष रूपमा सहयोग गर्ने सबैप्रति आभार व्यक्त गरेका थिए। यस कार्यशालाले साइ-टेक सोसाइटी पीएनसीले विद्यार्थीहरूको नवप्रवर्तन, सञ्चार सीप, नेतृत्व क्षमता तथा समग्र व्यक्तित्व विकासका लागि निरन्तर रचनात्मक कार्यक्रम सञ्चालन गर्ने आफ्नो प्रतिबद्धतालाई पुनः स्थापित गरेको जनाएको छ।
