पोखरा, २९ जेठ। नेपाल मेडिसिटी अस्पतालले पहिलो पटक देशमै सफल कलेजो प्रत्यारोपण सम्पन्न गरेर चिकित्सा क्षेत्रको ऐतिहासिक उपलब्धि हासिल गरेको छ। पोखरा निवासी ५६ वर्षीय ईश्वर बहादुर कार्कीको कलेजो प्रत्यारोपण जेठ ८ गते सफलतापूर्वक सम्पन्न भएको अस्पतालले जनाएको छ। कार्कीका २६ वर्षीय छोरा आयुष कार्कीले आफ्ना पिताका लागि कलेजो दान गरेका थिए।
कलेजो प्रत्यारोपणका लागि भारतको प्रतिष्ठित अमृता अस्पतालसँगको सहकार्यमा विशेषज्ञ चिकित्सकहरूको संयुक्त टोली बनाइएको थियो। अस्पतालका अनुसार कलेजो निकाल्ने प्रक्रिया झन्डै ९ घण्टा र प्रत्यारोपण १३ घण्टा लामो थियो। सर्जरीमा उच्च जोखिम रहेको भए पनि डाक्टरहरूको समर्पण र व्यवस्थापनले सफलतापूर्वक प्रत्यारोपण सम्पन्न भएको हो।
डा. उपेन्द्र महत्तोका अनुसार नेपालमै विश्वस्तरीय सेवा उपलब्ध गराउन सक्ने क्षमताले अब नेपालीहरूलाई उपचारका लागि विदेश धाउनुपर्ने बाध्यता अन्त्य हुने विश्वास गरिएको छ। ग्यास्ट्रोइन्टेरोलोजी विभाग प्रमुख डा. उमिद कुमार श्रेष्ठले कार्कीको कलेजो मात्र होइन, मिर्गौलासमेत बिग्रिएको अवस्था रहेको बताएका छन्। पेटमा पानी जम्ने, बेहोस हुने र रगत वान्ता हुने समस्याका कारण अन्य अस्पतालहरूले प्रत्यारोपण गर्न नसकेको जनाइएको छ।
आयुष कार्कीका अनुसार भारतमा दुई पटक प्रयास असफल भएपछि नेपालमै उपचार गराउने निर्णय लिइएको हो। कलेजो प्रत्यारोपण सर्जन डा. रामबाबु साहका अनुसार बिरामीलाई सबै जोखिमबारे अवगत गराएर मात्र सर्जरी गरिएको थियो। अहिले कलेजोको कार्यशैलीमा सुधार आएपछि मिर्गौलामा समेत सुधार देखिएको बताइएको छ।
यो उपलब्धिलाई नेपालको स्वास्थ्य सेवाको विकासतर्फको ठूलो पाइला मानिएको छ। विशेषज्ञहरूका अनुसार नेपालमा हरेक वर्ष २०० जना सम्म कलेजो प्रत्यारोपणको आवश्यकता पर्ने देखिएको छ, जसका लागि अब देशमै समाधान खोज्न सकिने आशा गरिएको छ।
