पोखरा, २१ जेठ। अमेरिकी राष्ट्रपति डोनाल्ड ट्रम्पले स्टिल र एलुमिनियममा लाग्ने आयात कर ५० प्रतिशतले बढाउने निर्णयमा हस्ताक्षर गरेका छन्। यो निर्णय बुधबारदेखि नै लागू गरिएको छ, जसले क्यानमा राखिएका खाद्यान्नदेखि कारसम्मको मूल्यमा प्रत्यक्ष असर पार्ने अनुमान गरिएको छ। ट्रम्प प्रशासनले यसअघि पनि मार्च महिनामा यस्तै प्रकारको कर वृद्धि गरेको थियो, तर यसपटक करदर दोब्बर बनाइएको हो।
आयात कर वृद्धिको प्रभावस्वरूप अमेरिकामा धातुजन्य उत्पादनको मूल्य उल्लेख्य रूपमा बढ्ने देखिएको छ। आलोचकहरू भन्छन्, यो कदमले बजारमा मूल्यवृद्धि मात्र होइन, व्यापारिक क्षेत्रमै अन्योलता निम्त्याउनेछ। धातुमा निर्भर उद्योगहरूले उत्पादन लागत बढ्नाले आफ्नो व्यवसाय धरमराउने संकेत दिएका छन्। धेरै व्यापारीले अब कागज वा प्लास्टिक सामग्रीको प्रयोगतर्फ आकर्षित हुने प्रयास गरिरहेका छन्, जसले आपूर्ति शृंखला र रोजगारीमा समेत असर पुर्याउन सक्छ।
युरोपेली युनियनपछि सबैभन्दा धेरै स्टिल अमेरिका आयात गर्ने मुलुकहरूमध्ये क्यानडा, ब्राजिल, मेक्सिको र दक्षिण कोरिया प्रमुख छन्। यी मुलुकहरूबाट अत्यधिक परिमाणमा स्टिल अमेरिका भित्रिने गरेको हुँदा, ट्रम्पको यो निर्णयसँगै ती देशहरूसँगको व्यापार सम्बन्धमा समेत असर पर्न सक्ने सम्भावना विश्लेषकहरूले व्यक्त गरेका छन्।
यो निर्णयले ट्रम्प प्रशासनको संरक्षणवादी आर्थिक नीतिको निरन्तरतासमेत देखाएको छ, जसले घरेलु उत्पादनलाई प्राथमिकता दिँदै आयातमा निर्भरता घटाउने उद्देश्य लिएको देखिन्छ। तर यसले आम उपभोक्ता र व्यवसायी दुवैलाई तत्काल प्रतिकूल असर पार्ने संकेत स्पष्ट रूपमा देखिएको छ।
