पोखरा २५, फागुन । अहमदाबादस्थित नरेन्द्र मोदी स्टेडियममा आइतबार सम्पन्न आईसीसी टी-२० विश्वकप २०२६ को फाइनलमा न्युजिल्यान्डलाई ९६ रनले पराजित गर्दै भारतले विश्वकपको उपाधिमाथि कब्जा जमाएको छ। यो विजयसँगै भारतले लगातार दोस्रोपटक र समग्रमा तेस्रोपटक विश्वकपको उपाधि जितेर कीर्तिमान कायम गरेको छ। सन् २००७ मा पहिलो संस्करणको उपाधि जितेको भारतले १७ वर्षको अन्तरालपछि सन् २०२४ मा दोस्रो उपाधि जितेको थियो। अहिलेको विजयले भारतलाई लगातार दोस्रोपटक उपाधि रक्षा गर्ने पहिलो टोलीको रूपमा विश्व क्रिकेटमा स्थापित गरेको छ। न्युजिल्यान्ड भने यसअघि सन् २०२१ को फाइनलमा अस्ट्रेलियासँग पराजित भएझैँ यसपटक पनि उपविजेतामै सीमित हुन पुग्यो।
फाइनल खेलमा टस हारेर पहिले ब्याटिङ गरेको भारतले निर्धारित २० ओभरमा ५ विकेट गुमाउँदै २५५ रनको विशाल योगफल खडा गरेको थियो। सन्जु सामसनले ४६ बलमा ५ चौका र ८ छक्कासहित सर्वाधिक ८९ रनको उत्कृष्ट इनिङ खेले। उनी प्रतियोगिताकै सर्वोत्कृष्ट खेलाडी (प्लेयर अफ द टुर्नामेन्ट) घोषित भए। त्यसैगरी, इशान किशनले २५ बलमा ५४ रन र अभिषेक शर्माले २१ बलमा ५२ रनको आक्रामक अर्धशतकीय योगदान दिए। अन्तिम समयमा शिवम दुबेले ८ बलमा २६ रनको छिटो-छरितो क्यामिओ खेलेपछि भारतले विशाल स्कोर तर्फ पाइला चालेको थियो। न्युजिल्यान्डका जिमी नीशमले ३ विकेट लिए पनि अन्य बलरहरू भारतीय ब्याटरसामु निरीह देखिएका थिए।
२५६ रनको चुनौतीपूर्ण लक्ष्य पछ्याएको न्युजिल्यान्डको ब्याटिङ क्रम भारतीय बलिङसामु निकै कमजोर साबित भयो। न्युजिल्यान्ड १९ ओभरमा १५९ रनमै समेटियो। न्युजिल्यान्डका लागि टिम सेफर्टले सर्वाधिक ५२ रन र कप्तान मिचेल सान्टनरले ४३ रन बनाए पनि टोलीलाई विजयको रेखा पार गराउन सकेनन्। भारतीय बलर जसप्रित बुमराहले निकै कसिलो बलिङ गर्दै ४ ओभरमा मात्र १५ रन खर्चिएर ४ महत्वपूर्ण विकेट लिए। अक्षर पटेलले पनि ३ विकेट हात पारे। बुमराह फाइनल खेलको ‘प्लेयर अफ द म्याच’ घोषित भए। शानदार घरेलु मैदानमा ८६ हजारभन्दा बढी दर्शकको उपस्थितिमा भारतले हात पारेको यो ऐतिहासिक विजयले नेपाली क्रिकेट प्रेमीहरूमा समेत उत्साह थपेको छ। लगातारको विजय यात्रा र ब्याटिङ तथा बलिङ दुवै क्षेत्रमा देखाएको अब्बल प्रदर्शनले भारत अहिले टी-२० क्रिकेटको अपराजित शक्ति बनेको छ।
