पोखरा २५, बैशाख। साताको अन्तिम कारोबार दिन शुक्रबार नेपाल स्टक एक्सचेन्ज (नेप्से) परिसूचक उल्लेखनीय रूपमा बढेको छ। लगातार दोस्रो दिन बजारमा सकारात्मक वातावरण देखिँदा नेप्से परिसूचक २७.४९ अंकले वृद्धि भएर २७४५ अंकमा पुगेको हो। यो अंक शुक्रबारको मात्र नभई साताभरिकै उच्च बिन्दुका रूपमा दर्ज भएको छ। कारोबार सुरु भएदेखि अन्तिम समयसम्म बजारले हरियो संकेत कायम राखेको थियो, जसले लगानीकर्तामा बजारप्रतिको विश्वास केही बलियो बनेको संकेत गरेको छ।
यसअघि बिहीबार पनि नेप्से परिसूचक ६.९४ अंकले बढेको थियो। समग्र रूपमा हेर्दा यो साता बजारले सुधारको लय समातेको देखिन्छ। गत साता २७३८ अंकमा बन्द भएको बजारले साताको अन्त्यसम्म आइपुग्दा थप उकालो यात्रा तय गरेको हो। बजार विश्लेषकहरूका अनुसार बैंकिङ प्रणालीमा तरलता सहज हुनु, लगानीकर्ताको मनोबल क्रमशः फर्किनु तथा जलविद्युत् र होटल समूहमा देखिएको सक्रियताले बजारमा सकारात्मक प्रभाव पारेको छ।
कारोबार रकममा पनि सुधार देखिएको छ। बिहीबार २ अर्ब ९३ करोड रुपैयाँ बराबरको कारोबार भएकोमा शुक्रबार यो रकम बढेर ३ अर्ब २८ करोड रुपैयाँ पुगेको छ। कुल कारोबार भएका कम्पनीहरूमध्ये २३५ कम्पनीको सेयर मूल्य बढेको छ भने २६ कम्पनीको मूल्य घटेको छ। आठ कम्पनीको मूल्य स्थिर रहेको नेप्सेले जनाएको छ। व्यापार समूह स्थिर रहे पनि अन्य सबै उपसमूहमा वृद्धि भएको छ। बैंकिङ समूह ०.६७ प्रतिशत, विकास बैंक ०.९५ प्रतिशत, फाइनान्स १.८७ प्रतिशत, होटल तथा पर्यटन १.४८ प्रतिशत र हाइड्रोपावर समूह १.७१ प्रतिशतले बढेका छन्। त्यस्तै लगानी, जीवन बीमा, उत्पादन तथा प्रशोधन, माइक्रोफाइनान्स र अन्य समूहका सूचकहरू पनि सकारात्मक देखिएका छन्।
शुक्रबार त्रिशूली जलविद्युत्को सेयर मूल्य सबैभन्दा धेरै १० प्रतिशतले बढेको छ। होटल फरेस्ट इनको मूल्य ७.९० प्रतिशत, सूर्यकुण्ड हाइड्रो इलेक्ट्रिकको ६.१२ प्रतिशत तथा पियोर इनर्जीको ५.३४ प्रतिशतले वृद्धि भएको छ। बजारमा सबैभन्दा धेरै कारोबार हुने कम्पनीहरूमा होटल फरेस्ट इन, रिलायन्स स्पिनिङ मिल्स, सोलु हाइड्रोपावर, ङादी ग्रुप तथा रिडी पावर रहेका छन्। यता स्वाबलम्बन लघुवित्तको सेयर मूल्य ६.५४ प्रतिशतले घट्दा फरवार्ड माइक्रोफाइनान्सको मूल्य पनि २.४७ प्रतिशतले ओरालो लागेको छ।
शेयर बजारमा पछिल्ला दिनहरूमा देखिएको सुधारले लगानीकर्तामा आशा जगाएको छ। यद्यपि विश्लेषकहरूले बजारको आगामी दिशा आर्थिक नीतिहरू, ब्याजदरको अवस्था तथा लगानीकर्ताको मनोविज्ञानमा निर्भर रहने बताएका छन्।
