पोखरा, २१ जेठ। युरोपको स्मार्टफोन बजारमा सन् २०२५ को पहिलो त्रैमासिकमा पनि एप्पल र सामसङले आफ्नो बलियो पकड कायम राख्न सफल भएका छन्। काउन्टरपोइन्ट रिसर्चले सार्वजनिक गरेको पछिल्लो प्रतिवेदनअनुसार, यी दुई अग्रणी ओईएम कम्पनीहरूले युरोपमा सबैभन्दा धेरै बिक्री हुने दस स्मार्टफोनमध्ये पाँच–पाँच डिभाइस राख्न सफल भएका छन्।
उक्त अवधिमा सबैभन्दा धेरै बिक्री हुने स्मार्टफोनको सूचीमा एप्पलको आईफोन १६ प्रो शीर्ष स्थानमा रहेको छ। यस डिभाइसले एक्लै ६ प्रतिशत बजार हिस्सा ओगटेको उल्लेख गरिएको छ। यसलाई पछ्याउँदै क्रमशः आईफोन १६ प्रो म्याक्स र साधारण आईफोन १६ रहेका छन्, जसले आ–आफ्नो तर्फबाट ५ प्रतिशत बिक्री हिस्सा कमाएका छन्।
सामसङतर्फबाट ग्यालेक्सी एस२५ अल्ट्रा र एस२५ स्मार्टफोनहरूले क्रमशः ३ प्रतिशत बजार हिस्सा ओगटी चौथो र पाँचौं स्थानमा स्थान बनाएका छन्। त्यसपछि, सामसङकै ग्यालेक्सी एस२४, ए५५ र ए१६ फाइभजीले समान २ प्रतिशत बिक्री हिस्सा पाएका छन्।
यो सूचीमा विशेष ध्यान तान्ने नयाँ डिभाइसको रूपमा आईफोन १६ई देखा परेको छ, जसले सार्वजनिक घोषणा भएको पहिलो पूर्ण महिनामै शीर्ष दसभित्र प्रवेश गर्न सफल भएको छ। तर प्रारम्भिक बिक्री प्रदर्शन विगतका एसई मोडेलहरूसँग तुलना गर्दा कमजोर देखिएको काउन्टरपोइन्टले औंल्याएको छ। आईफोन १६ई को सुरुवाती मूल्य ६९९ यूरो रहेको छ भने विगतका एसई (२०२०) र एसई (२०२२) मोडेलहरू क्रमशः ४७९ र ५१९ यूरोमा उपलब्ध भएका थिए।
युरोपेली बजारमा अझै पनि एप्पलले आईफोन १५ उपलब्ध गराइरहेको छ, जुन यस त्रैमासिकको दसौं सबैभन्दा धेरै बिक्री हुने स्मार्टफोन बनेको रिपोर्टमा उल्लेख छ।
एप्पलको नवप्रवर्तन र उच्च मूल्य रणनीतिले बजारको अग्रस्थान ओगट्न सफल भएको देखिए पनि सामसङका नयाँ मोडेलहरू पनि प्रतिस्पर्धात्मक रूपमा उभिन सफल देखिन्छन्।
