पोखरा, २१ जेठ। भारतीय क्रिकेटका सुपरस्टार विराट कोहलीको कप्तानीमा रोयल च्यालेन्जर्स बैंगलोर (आरसीबी) ले अन्ततः इन्डियन प्रिमियर लिग (आईपीएल) को उपाधि जितेर १७ वर्ष लामो प्रतीक्षालाई पूर्णविराम दिएको छ। मंगलबार अहमदाबादमा भएको फाइनल खेलमा पन्जाब किंग्सलाई ६ रनले पराजित गर्दै आरसीबीले यो ऐतिहासिक सफलता हात पारेको हो। यस जितसँगै सीमित ओभरका क्रिकेटमा बादशाह मानिएका कोहलीको फ्रेन्चाइज लिग उपाधि जित्ने सपना साकार भएको छ।
सन् २००८ मा भारतले यु-१९ विश्वकपको उपाधि जित्दा कोहली कप्तान थिए। सोही वर्ष आईपीएलको सुरुवात भयो र कोहलीले आरसीबीबाट आफ्नो यात्रा सुरु गरे। व्यक्तिगत रूपमा थुप्रै सफलता हासिल गरे पनि आरसीबीलाई उपाधि दिलाउन नसक्दा उनीमाथि निरन्तर दबाब थियो। यो सिजनसमेत उपाधि चुम्न नसकेको भए यो विषय उनको जीवनभर खट्किने थियो। तर, मंगलबारको जितले त्यो अभावलाई पूरा गरिदिएको छ। आरसीबीले प्रस्तुत गरेको १९० रनको लक्ष्य पछ्याउने क्रममा पन्जाब १८४ रनमा समेटिएपछि कोहलीको टोलीले बहुप्रतिक्षित उपाधि हात पार्यो। आरसीबीको जितमा क्रुनाल पाण्डे, भुवनेश्वर कुमार र यश दयालको उत्कृष्ट बलिङ महत्वपूर्ण रह्यो।
कोहलीको भाग्य गत वर्षको टी-२० विश्वकपको फाइनलसँग पनि मिल्दोजुल्दो देखिन्छ, जहाँ भारतले १७६ रनको लक्ष्य जोगाएर उपाधि जितेको थियो र कोहलीले ५९ बलमा ७६ रन बनाएका थिए। यसपटकको फाइनलमा उनी पूर्ण नायक नभए पनि आरसीबीका लागि सर्वाधिक ४३ रनको योगदान दिएका थिए। कोहलीको कप्तानीमा भारतले यसअघि सन् २०१३ मा च्याम्पियन्स ट्रफी र सन् २०२४ मा टी-२० विश्वकपको उपाधि जितिसकेको छ। यद्यपि, २०११ को एकदिवसीय विश्वकपमा उनले ३५ रन बनाए पनि भारतले उपाधि जित्यो। सचिन तेन्दुलकरको ५१ एकदिवसीय शतकको कीर्तिमानलाई समेत उछिनेका कोहलीले कुल ८१ अन्तर्राष्ट्रिय शतक प्रहार गरिसकेका छन्। क्रिकेटका महान खेलाडी सचिन तेन्दुलकर र रिकी पोन्टिङको नामसँगै कोहलीको नाम सीमित ओभरको क्रिकेटका बादशाहका रूपमा स्थापित भइसकेको छ। यसअघि तीन पटक (२००९, २०११ र २०१६) फाइनलमा पुगेर पनि उपाधि जित्न नसकेको आरसीबीका लागि यो चौथो प्रयास ऐतिहासिक बनेको छ।
