पोखरा ४, फागुन । राजधानी काठमाडौंको टुँडिखेलमा अमेरिकी सेनाले परेड खेलेको भनी सामाजिक सञ्जालमा तस्वीर भाइरल भएपछि नेपाली सेनाको जंगी अड्डाले यसबारे स्पष्टीकरण दिएको छ। आसन्न प्रतिनिधिसभा निर्वाचनको पूर्वसन्ध्यामा सेना दिवस तथा महाशिवरात्रिको अवसर पारेर सार्वजनिक भएको उक्त तस्वीरलाई लिएर विभिन्न टीकाटिप्पणी भएपछि सेनाले यो एक नियमित र पारस्परिक सम्बन्ध बुझाउने अभ्यास मात्र भएको स्पष्ट पारेको छ। नेपाली सेनाका प्रवक्ता सहायक रथी राजाराम बस्नेतका अनुसार सेना दिवसका अवसरमा आयोजना गरिने समारोहमा अन्य मित्रराष्ट्रका सैन्य ब्यान्ड टोलीले मैत्रीपूर्ण सहभागिता जनाउने पुरानै परम्परा हो। यसअघि पनि नेपाली सेनाको ब्यान्ड टोली भारतको सेना दिवसमा सहभागी हुन गएको र त्यहाँ नेपाली भाषामै उद्घोषण गरिएको उदाहरण दिँदै उनले यसलाई ‘आर्मी टु आर्मी’ अपरेसन अन्तर्गतको नियमित प्रक्रिया भएको बताउनुभयो।
नेपाल र अमेरिकाबीच सन् १९४७ देखि नै सैन्य सम्बन्ध रहँदै आएको छ र यो प्रस्तुति विगतका सरकारहरूको पालामा पनि निरन्तर चल्दै आएको अभ्यास हो। नेपालले अमेरिका मात्र नभई भारत, चीन, बेलायत र पाकिस्तानजस्ता देशका सेनासँग पनि संयुक्त सैन्य अभ्यास र युवा आदानप्रदान कार्यक्रमहरू गर्दै आएको छ। यद्यपि, निर्वाचनको मुखमा यस विषयलाई राजनीतिक रङ्ग दिँदै कतिपय पक्षले यसलाई पश्चिमा शक्ति राष्ट्रको प्रभावका रूपमा व्याख्या गर्न खोजेका छन्। सेनाले भने यस्ता भ्रामक खबरहरूको पछि नलाग्न र विगतका केपी शर्मा ओली, पुष्पकमल दाहाल र शेरबहादुर देउवाको कार्यकालमा पनि यस्ता अभ्यासहरू नियमित रूपमा भएको स्मरण गराएको छ। सैन्य कुटनीति र दुई देशबीचको दशकौँ लामो सम्बन्धलाई चुनावी मसला नबनाउन जंगी अड्डाले सबै सरोकारवालासँग आग्रह गरेको छ।
