पोखरा १६, माघ। गैर आवासीय नेपाली संघ (एनआरएनए) को १२औँ विश्व सम्मेलनलाई भव्य र व्यवस्थित रूपमा सम्पन्न गर्न सरकारले परराष्ट्रमन्त्रीको अध्यक्षतामा एक उच्चस्तरीय आयोजक समिति गठन गरेको छ। परराष्ट्र मन्त्रालयको मन्त्रीस्तरको हालैको निर्णयअनुसार आगामी फागुन २९ देखि चैत्र २, २०८२ (मार्च १४–१६, २०२६) सम्म काठमाडौँमा आयोजना हुने यस विश्व सम्मेलनको सम्पूर्ण तयारी र व्यवस्थापनका लागि यो शक्तिशाली समिति बनाइएको हो। डायस्पोरामा रहेका नेपालीहरूको ज्ञान, सीप र पुँजीलाई राष्ट्र निर्माणमा जोड्ने उद्देश्यले आयोजना हुन लागेको यस सम्मेलनलाई विशेष महत्त्वका साथ हेरिएको छ।
नवगठित उच्चस्तरीय समितिमा नेपाल सरकारका विभिन्न मन्त्रालयका सचिवहरू र सरोकारवाला निकायका प्रमुखहरूको सहभागिता रहेको छ। समितिको सदस्यहरूमा राष्ट्रिय योजना आयोगका सदस्य, परराष्ट्र सचिव, अर्थ सचिव, उद्योग सचिव र कानुन सचिव रहनुभएको छ। त्यसैगरी, नेपाल लगानी बोर्डका प्रमुख कार्यकारी अधिकृत, परराष्ट्र मन्त्रालयको श्रम आप्रवासन तथा नेपाली डायस्पोरा समन्वय महाशाखा र आर्थिक कूटनीति महाशाखाका सह–सचिवहरू पनि समितिमा हुनुहुन्छ। निजी क्षेत्रको प्रतिनिधित्वका लागि नेपाल उद्योग वाणिज्य महासंघ, नेपाल उद्योग परिषद् र नेपाल चेम्बर अफ कमर्सका अध्यक्षहरूलाई पनि सदस्यको रूपमा समावेश गरिएको छ।
संघ भित्रको एकतालाई सुदृढ गर्दै आयोजना हुन लागेको यस सम्मेलनमा एनआरएनएका दुवै अध्यक्षहरू डा. बद्री केसी र महेश कुमार श्रेष्ठको सक्रिय सहभागिता रहनेछ। उहाँहरू दुवैजना आयोजक समितिको सदस्यको रूपमा रहनुभएको छ भने एनआरएनएका प्रमुख कार्यकारी अधिकृतलाई पनि सदस्य बनाइएको छ। यस समितिले सम्मेलनको कार्यतालिका निर्माण, सुरक्षा व्यवस्थापन, कूटनीतिक समन्वय र विदेशी पाहुनाहरूको आतिथ्यता लगायतका पक्षहरूमा काम गर्नेछ। मुलुकको आर्थिक समृद्धिमा गैर आवासीय नेपालीहरूको भूमिकालाई थप प्रभावकारी बनाउन यो सम्मेलनले ठोस मार्गचित्र तय गर्ने अपेक्षा गरिएको छ।
