पोखरा ११, पौष। सन् २०२५ को अन्त्य र २०२६ को सुरुवातसँगै भियतनाम क्षेत्रीय तथा अन्तर्राष्ट्रिय स्तरमा पारिवारिक भ्रमणका लागि लोकप्रिय गन्तव्यका रूपमा उदाएको छ। डिजिटल ट्राभल प्लेटफर्म अगोडाले सार्वजनिक गरेको पछिल्लो प्रतिवेदन अनुसार, सेप्टेम्बरदेखि नोभेम्बरसम्मको खोज तथ्याङ्कले डिसेम्बर र जनवरी महिनाका लागि भियतनाममा पारिवारिक भ्रमणको रुचि गत वर्षको तुलनामा ३० प्रतिशतले बढेको देखाएको छ। विशेषगरी एसियाली देशहरूबाट भियतनाम भ्रमण गर्ने परिवारहरूको संख्यामा उल्लेखनीय वृद्धि भएको छ। दक्षिण कोरियाली पर्यटकहरूका लागि भियतनाम पहिलो रोजाइ बनेको छ भने भारत, सिङ्गापुर, अस्ट्रेलिया र मलेसियाका परिवारहरू पनि प्रमुख पाँच आकर्षणका स्रोत मुलुकमा परेका छन्।
भियतनाममा भारतीय परिवारहरूको भ्रमण रुचिमा सबैभन्दा तीव्र वृद्धि देखिएको छ, जहाँ अगोडाका अनुसार खोजी संख्यामा १८६ प्रतिशतले बढोत्तरी भएको छ। त्यस्तै, मलेसियाली पर्यटकहरूको रुचिमा ७४ प्रतिशतको वृद्धि देखिएको छ। अगोडा भियतनामका कन्ट्री डाइरेक्टर वु न्गोक लामका अनुसार भियतनामको मौलिक संस्कृति, विविध परिकार, मनमोहक प्राकृतिक दृश्य र परिवार-मैत्री रिसोर्टहरूले गर्दा यस क्षेत्रलाई विश्व पर्यटन मानचित्रमा बलियो बनाएको हो। यस मौसममा फु क्वोक टापु सबैभन्दा लोकप्रिय गन्तव्य बनेको छ, जहाँ पर्यटकीय खोजीमा ४७ प्रतिशतले वृद्धि भएको छ। यहाँका शान्त समुद्री तट र प्रकृति पार्कहरू बहु-पुस्ताका परिवारहरूका लागि उपयुक्त मानिएका छन्।
फु क्वोकपछि दा नाङ ४२ प्रतिशतको वृद्धिसहित दोस्रो स्थानमा रहेको छ, जुन बा ना हिल्स थिम पार्कका लागि प्रसिद्ध छ। यस्तै, तटीय क्षेत्र न्हा ट्राङ, जीवन्त हो ची मिन्ह सिटी र सांस्कृतिक सम्पदाले भरिपूर्ण राजधानी हनोई पनि शीर्ष पाँच गन्तव्यभित्र परेका छन्। रोचक कुरा के छ भने, भियतनामी परिवारहरू सामान्यतया डिसेम्बर-जनवरीमा विदेश यात्रा कम गर्ने भए तापनि यस वर्ष चीनतर्फको आकर्षण बढेको छ। साङ्घाई र बेइजिङका लागि भियतनामी पर्यटकहरूको खोजीमा झन्डै ६० प्रतिशतले वृद्धि भएको छ, जसको मुख्य कारण हनोई र चिनियाँ सहरहरूबीच थपिएका सिधा हवाई उडानहरू हुन्। यसरी भियतनामले आफ्नो आन्तरिक र बाह्य दुवै पर्यटन बजारमा नयाँ उत्साह थपेको छ।
