पोखरा २२, भाद्र। देशभर आक्रामक प्रदर्शनमा उत्रिएका जेन-जी युवाहरू सिंहदरबारभित्रै प्रवेश गरेका छन्। मंगलबार बिहानैदेखि आक्रामक रूपमा प्रदर्शन गरिरहेका प्रदर्शनकारीहरूले गेट तोडेर प्रवेश गरेको र यसले स्थितिलाई थप तनावग्रस्त बनाएको छ। सोमवारको प्रदर्शनमा १९ जनाको ज्यान गएपछि युवाहरूको आक्रोश थप बढेको र यसको परिणामस्वरूप देशभरका प्रमुख शहरहरूमा प्रदर्शन भइरहेको छ।
प्रदर्शनकारीहरूले शीर्ष नेताका निवास, पार्टी कार्यालय, र प्रहरी कार्यालयहरूमा लगातार ढुंगामुढा गरिरहेका छन्। यस अवस्थामा सुरक्षा व्यवस्था नियन्त्रण बाहिर गएको देखिएको छ। अहिले मन्त्रीहरूलाई समेत नेपाली सेनाको हेलिकप्टरबाट सुरक्षित स्थानमा सारिएको छ। सरकारको दमनकारी नीतिले नागरिकको असन्तुष्टि र आक्रोशलाई थप बढाएको छ, जसले गर्दा अहिलेको स्थिति सरकारको नियन्त्रण बाहिर गएको देखिन्छ। सिंहदरबारजस्तो अति संवेदनशील क्षेत्रमा प्रदर्शनकारीहरू प्रवेश गर्नुले देशको सुरक्षा व्यवस्थामाथि गम्भीर प्रश्न खडा गरेको छ।
