पोखरा, २८ असार। कोरोना महामारीपछिको लामो समयको सुनसानतालाई तोड्दै सिमकोट विमानस्थल पुनः चलायमान बनेको छ। शुक्रबार मात्रै विमानस्थलमा १६४ पटक उडान र अवतरण भएको सिमकोट नागरिक उड्डयन प्राधिकरण हुम्लाले जानकारी दिएको छ। मानसरोवर–कैलाश तीर्थयात्राका लागि भारतीय भक्तजनको आगमनसँगै विमानस्थल अत्यन्त व्यस्त बनेको हो।
विमानस्थलका प्रमुख महेन्द्रबहादुर सिंहका अनुसार नेपालगञ्जबाट मात्र ३२ उडानहरू भई ६४ उडान-अवतरण सम्पन्न भएका छन्। त्यस्तै, सिमकोटबाट हिल्सा नाकासम्मका लागि हेलिकप्टरमार्फत ५० पटक उडान र अवतरण गरिएपछि जम्मा १६४ उडान मुभमेन्ट भएको उनले जानकारी दिए।
शुक्रबार सीता एयरले १०, तारा एयरले ७, समिट एयरले १४ तथा नेपाल एयरलाइन्सले १ उडान गरेको थियो। हाल सिमकोट विमानस्थलबाट नियमित रूपमा सीता, तारा र समिट एयरका जहाजहरूले सेवा दिइरहेका छन्।
भारतीय तीर्थयात्रीहरूलाई हिल्सा नाका पुर्याउने उद्देश्यले हाल सिमकोट विमानस्थलमै ५ वटा हेलिकप्टर खटिएका छन्। तीमध्ये सिम्रिक एयर, प्रभु, माउन्टेन, कैलाश र फिस्टेल एयरका हेलिकप्टरहरूले सेवा दिइरहेका छन्।
हिल्सा नाका खुलेसँगै चैत ४ गतेदेखि अहिलेसम्म १२७१ भारतीय तीर्थयात्रीले कैलाश मानसरोवरको दर्शन गरिसकेका छन्। तीमध्ये ६२२ महिला र ६४९ पुरुष रहेका छन्। साथै, अन्य मुलुकका ७० महिला र ७९ पुरुष समेत सिमकोट हुँदै तीर्थयात्रा गरेका छन्।
अहिलेसम्म ५ वटा हेलिकप्टरमार्फत ११८८ तीर्थयात्री सिमकोट–हिल्सा बीचमा आवतजावत गरिसकेका छन्। तीमध्ये १०६० भारतीय तीर्थयात्री र बाँकी अन्य मुलुकका रहेका छन्।
कोरोना महामारीपछिको यो व्यस्तता सिमकोट विमानस्थलको पुनः सजीवताको स्पष्ट संकेत हो। मानसरोवर–कैलाश दर्शनका लागि आउने तीर्थयात्रीहरूमार्फत हुम्लाको पर्यटन क्षेत्रमा समेत नयाँ ऊर्जा थपिएको देखिन्छ।
